Romanz De L'estoire Dou Graal

The Project Gutenberg EBook of Li Romanz de l'estoire dou Graal by Robert de Boron

Copyright laws are changing all over the world. Be sure to check the copyright laws for your country before downloading or redistributing this or any other Project Gutenberg eBook.

This header should be the first thing seen when viewing this Project Gutenberg file. Please do not remove it. Do not change or edit the header without written permission.

Please read the legal small print, and other information about the eBook and Project Gutenberg at the bottom of this file. Included is important information about your specific rights and restrictions in how the file may be used. You can also find out about how to make a donation to Project Gutenberg, and how to get involved.

**Welcome To The World of Free Plain Vanilla Electronic Texts**

**eBooks Readable By Both Humans and By Computers, Since 1971**

*****These eBooks Were Prepared By Thousands of Volunteers!*****

Title: Li Romanz de l'estoire dou Graal

Author: Robert de Boron

Release Date: January, 2004 [EBook #4936] [Yes, we are more than one year ahead of schedule] [This file was first posted on April 6, 2002] [Most recently updated: April 6, 2002]

Edition: 10

Language: French

*** START OF THE PROJECT GUTENBERG EBOOK, LI ROMANZ DE L'ESTOIRE DOU GRAAL ***

This eBook was produced by Carlo Traverso, Robert Rowe, Charles Franks and the Online Distributed Proofreading Team.

Robert de Boron (attributed)

Li Romanz de l'estoire dou Graal

We thank the Bibliotheque Nationale de France that has made available the image files at www://gallica.bnf.fr, authorizing the preparation of the etext through OCR.

Nous remercions la Bibliothèque Nationale de France qui a mis à disposition les images dans www://gallica.bnf.fr, et a donné l'autorisation de les utiliser pour préparer ce texte.

Ci commence li R[o]manz de l'esto[i]re dou Graal.

Savoir doivent tout pecheeur

Et li petit et li meneur

Que devant ce que Jhesus-Criz

Venist en terre, par les diz

Fist des prophetes anuncier

Sa venue en terre, et huchier

Que Diex son fil envoieroit

Çà-jus aval, et soufferroit

Mout de tourmenz, mout de doleurs,

Mout de froiz et mout de sueurs.

A icel tens que je vous conte,

Et roi et prince et duc et conte,

Nostres premiers peres Adam,

Eve no mere et Abraham,

Ysaac, Jacob, Yheremyes

Et li prophetes Ysayes,

Tout prophete, toute autre gent,

Boen et mauveis communément,

Quant de cest siecle departoient,

Tout droit en enfer s'en aloient.

Quant li Deables, li Maufez,

Les avoit en enfer boutez,

Gaaigniez avoir les quidoit

Et en ce adès mout se fioit.

Les boennes genz confort avoient

Ou Fil Dieu, que il attendoient.

Lors si plut à Nostre-Seigneur,

Qu'il nous féist trestouz honneur

Et qu'il en terre descendist

Et nostre humeinne char préist;

Dedenz la Virge s'aümbra,

Tele com la voust la fourma;

Simple, douce, mout bien aprise,

Toute la fist à sa devise.

Pleinne fu de toutes bontez,

En li assist toutes biautez;

Ele est fleiranz comme esglentiers;

Ele est ausi com li rosiers,

Qu'ele porta la douce rose

Qui fu dedenz sen ventre enclose.

Ele fu Marie apelée,

De touz biens est enluminée;

Marie est dite, mer amere;

Fille Dieu est, si est sa mere;

Et Joachins si l'engenra,

Anne sa mere la porta,

Qui andui ancien estoient.

Onques enfant éu n'avoient;

Meis mout en estoient irié,

Et Diex leur eut tost pourchacié

Par son angle, qu'il envoia

A Joachym, quant il ala

Ou desert à ses pastouriaus;

Et demoura aveques aus,

Pour ce que courouciez estoit

De s'offrande que li avoit

L'esvesque ou temple refusée,

Pour ce que n'avoit engenrée

Nule portéure en sa fame,

Ki estoit de sa meison dame.

Ce dist l'angles à Joachyn:

«Va tost, si te mest au chemin,

Que Diex le t'a par moi mandé;

Et se m'a-il mout commandé

Enseurquetout que je te die

Ta volentez iert acomplie,

Car tu une pucele aurras,

Et Marie l'apeleras.

D'Anne ta fame iert engenrée,

En son ventre saintefiée,

N'en sa vie ne pechera

Tout son aage que vivra.

De ce ne soies esperduz;

Et que j'en soie mieux créuz,

Par Jherusalem t'en iras

Et à la porte enconterras

Ta fame, puis vous en irez

En vo meison et si serez

Ensemble comme boenne gent:

Ainsi avendra vraiement.»

Le pueple que il feit avoit

D'Evein et d'Adam, couvenoit

Raieimbre et giter hors d'enfer

Que tenoit enclos Lucifer

Pour le pechié d'Adam no pere,

Que li fist feire Eve no mere

Par la pomme qu'ele menja

Et qu'ele son mari donna.

Entendez en quantes mennieres

Nous racheta Diex nostres peres:

Li Peres la raençon fist,

Par lui, par son fil Jhesu-Crist,

Par le Saint-Esprit tout ensemble.

Bien os dire, si con moi semble,

Cil troi sunt une seule chose,

L'une persone en l'autre enclose.

Diex voust que ses fiuz char préist

De la Virge et que de li naschist,

Et il si fist puis que lui plust;

Pour rien contredist ne l'éust.

Cil Sires, qui humanité

Prist en la Virge, humilité

Nous moustra grant quant il venir

Daigna en terre pour morir,

Pour ce que il voloit sauver

L'uevre son pere et delivrer

De la puissance L'Ennemi,

Qui nous eut par Eve trahi.

Quant ele vit qu'ele eut pechié,

Si ha tant quis et pourchacié

Que Adans ses mariz pecha;

Car une pomme li donna

Que Diex leur avoit deveé

Et trestout l'autre abandonné;

Meis il tantost la mist au dent

Et en menja isnelement.

Et tantost comme en eut mengié,

Pourpensa soi qu'il ot pechié;

Car il vit sa char toute nue,

Dont il ha mout grant honte éue.

Sa fame nue véue ha,

A luxure s'abandonna.

Après ce coteles se firent

De fueilles, qu'ensemble acousirent.

Et quant Nostres-Sires ce vist,

Adan apele et si li dist:

«Adan, où ies-tu?»—«Je sui çà.»

Tantost de delist les gita,

Si les mist en chetivoison

Et en peinne pour tel reison.

Eve eut conçut, si enfanta

A grant doleur ce que porta,

Et li et toute sa meisnie

Eut li Deables en baillie;

A la mort les vout touz avoir.

En enfer les covint mennoir

Tant com Diex le vout, et ne plus,

Qu'il envola sen fil çà-jus

Pour saver l'uevre de son père;

Si en soufri la mort amere.

Pour ce besoing prist-il no vie

Ou ventre la virge Marie,

Et puis en Bethleem naschi

De la Virge, si cum je di.

Ceste chose seroit greveinne

A dire, car ceste fonteinne

Ne pourrait pas estre espuisie

Des biens qu'a la virge Marie.

Dès or meis me couvient guenchir

A ma matere revenir,

De ce que me rememberrai,

Tant cum santé et povoir ei.

Voirs est que Jhesus-Criz ala

Par terre; et si le baptisa

Et ou flun Jourdein le lava

Sainz Jehans, qu'il li commanda

Et dist: «Cil qui en moi creirunt,

En eve se baptiserunt

Ou non dou Pere et dou Fil Crist

Et ensemble dou Saint-Esprist,

Que par ice serunt sauvé,

Dou povoir l'Anemi gité,

Tant que il s'i remeterunt

Par les pechiez que il ferunt.»

A sainte Eglise ha Diex donné

Tel vertu et tel poesté.

Saint Pierres son commandement

Redona tout comunalment

As menistres de sainte Eglise,

Seur eus en ha la cure mise:

Ainsi fu luxure